2Ti 3 | KSD | STEP | Ma una nunure go, ba ta ra mutuaina ta umana kilala na varvakadik diat a pot.

2 Timothy 3

A mutuaina e

1 Ma una nunure go, ba ta ra mutuaina ta umana kilala na varvakadik diat a pot. 2 Tago ra tarai diat a mari ka diat mulai, ma diat a mainge bula ra mani, diat a tata vangala pa diat mulai, diat a vavagia pa diat mulai, diat a tatata kaina, diat a piam ra umana tavu i diat, ma pa diat a pite varpa ure ta magit, ma pa na gomgom ra tulungea i diat, 3 ma pa diat a varmari vargil, ma pa diat a varmaram, ma diat a varurai, ma pa diat a tigal valar pa ra paka i diat, a umana lup kankan, ma diat a milikuane ra boina, 4 a umana tena vavagu, a umana rangrang, ma na ngala ra nuknuk i diat ure diat mulai, ma diat a manga mainge ra nilibur ma pa diat a mari God; 5 a malalar i ra lotu na tur pire diat, ma diat a varpuai ure ra dekdekina; una vana kan diat, dia dari. 6 Damana diat dia kokoa ruk tai ta umana pal, ma dia ting valar pa diat ra umana lunga na vavina nina i tar anguvai pire diat ra lavur varpiam, ma ra lavur kaina mamainga i kap vurvurbingitane diat, 7 dia vartovo vatikai, ma pa dia tadav ra dovotina. 8 Ma da Ianes ma Iambres dir ga onge bat Moses, damana go diat, dia onge bat ra dovotina; a tarai i bilak ra nuknuk i diat, pa dia topa ra nurnur. 9 Ma pa diat a pait valar pa ia; tago da al vapange kadia papaua pire ra tarai parika, upi na varogop ma nam di ga pait ia ure kadir.

A mutuaina tinata na varvakapa

10 Ma u ga tar mur bulu kaugu vartovo, ma kaugu mangamangana, kaugu togotogo, kaugu nurnur, kaugu kini vamadudur, kaugu varmari, kaugu kini vovovon; 11 ma ra lavur milmilikuan ma ra kinadik i tar tadav iau aro Antiokia ma Ikonion, ma Listra, ma iau ga pidik tar ta nam ra umana magit na milmilikuan; ma ra Luluai i ga valaun iau kan diat parika. 12 Maia pa, ma diat par dia mainge ba dia mur ra mangamangana kai God tai Kristo Iesu, diat a kairane bula ra milmilikuan. 13 Ma diat ra umana tena varpiam ma ra umana tena vavagu diat a manga kaina vanavana, dia varara ma di varara bula diat. 14 Ma una tur uka ta ra magit di ga tovo tar ia tam, ra magit i ot ra nuknukim tana, tago u nunure nina i tar tovo u; 15 papa ba u ga bul u tar nunure ra Buk Tabu nina i pait vakabinana valar pa u, upi una laun ta ra nurnur tai Kristo Iesu. 16 A lavur pakana Buk Tabu i vuna tai God ma i topa ra vartovo, ma ra varpit, ra varvaminana, ma ra vartovo ta ra mangamangana takodo; 17 upi ra tutana kai God na ko vurakit, ma na vargal bulu upi ra lavur bo na mangamangana parika.